சௌமிய தேசம் உங்களை உளமகிழ்ந்து வரவேற்கிறது வாருங்கள் என்னுயிரின் ஓசை கேட்க .... !.......... பிரியமுடன் சீராளன்

சனி, 2 செப்டம்பர், 2017

பச்சை இதழ் இட்ட மது !



சந்தமிகத் தந்தகவிச்  சிந்தனையும்  எந்தனுயிர்
வந்தவளைச் சார்ந்துமணம் வீசுதே - அவள்
கந்தமிகக் கொண்டகுழல் விந்தையெனத் தென்றலதும்  
உந்தியெழத் தந்துதமிழ் பேசுதே  !


அந்திவருந் தந்தியவள் அஞ்சிறையுள் இட்டதனால்
முந்திவரும் கந்தமதைக் கூறுதே  -  விழி
குந்திமகன் அம்பெனவும் கோதைமகன் அன்பெனவும்
விந்தைபுரிந் துள்ளமதைக் கீறுதே !

எந்தயிடம்  வந்திடினும் ஏந்திழையாள் அன்புதனைச் 
சிந்தைதனில்  வைத்துமகிழ்ந்  தாடுவேன் - விதி
மந்தகுணந்  தந்துவுடல்  மண்ணறையில் இட்டபினும்   
மஞ்சரியாள்  கொஞ்சுதமிழ்  தேடுவேன் !

பங்கயமாய்க் காலையவள் பண்ணழகுப்  பார்வைதரப்
பாவலனாய்ப்  பாடிமகிழ்ந் தாடுவேன் - இல்லை
கங்குலெழும் முன்னொளியில் இங்கவளும்  இல்லையெனில்  
கற்பனைகள் ஈன்றமனம்  மூடுவேன் !

பண்பொளிரும்   பைங்கொடியாள் பஞ்சுமொழிப் புன்னகையாள்
பச்சையிதழ்  இட்டமதுக் காரிகை   - வான்
தண்ணொளிரும் வெண்மதியின் தங்கையெனத் தன்னினைவைத்
தந்துயிரைத் தொட்டபுதுத்  தாரகை !


பாவலர் வீ. சீராளன்

19 கருத்துகள்:

KILLERGEE Devakottai சொன்னது…

படிப்பதற்கு சுகமான வார்த்தைகள் தொடர்ந்து எழுதுங்கள் பாவலரே...

athira சொன்னது…

ஆவ்வ்வ்வ்வ் மேஜரும் இன்று புயுப் போஸ்ட் போட்டிட்டார்ர்ர்..:)..

படத்திலே.. இச்சை அழித்தது/// என ழி போட்டிருக்கிறீங்க.. முதலில் எழுத்துப்பிழை விட்டிட்டார்ர் சீராளன் என நினைச்சு.. றீச்சர் ஓடியாங்கோ என சொல்ல நினைச்ச வேளை.. ஹையோ இல்ல இது இச்சையை இல்லாமல் ஒழிச்சது எனப் பொருள்படும் என எடுத்திட்டேன்ன்.. ஒரு எழுத்தில் எவ்வளவு அர்த்தங்கள்..

கரந்தை ஜெயக்குமார் சொன்னது…

அருமை நண்பரே
படிக்கப் படிக்க இனிக்கிறது
தொடர்ந்து எழுதுங்கள்

athira சொன்னது…

கவிதை நன்றாக இருக்கு.. ஆனா சில தமிழ் எனக்குப் புரிவதில்லை.. அடுத்தமுறை மேஜரே.. பேச்சுத்தமிழில் ஒரு கவிதை எதிர்பார்க்கிறேன் உங்களிடமிருந்து:).

புலவர் இராமாநுசம் சொன்னது…

கவிதை அருமை! தொடருங்கள் தொடர்வேன் த ம 2

KILLERGEE Devakottai சொன்னது…

பலமுறை வந்தும் தமன்னாவை கரைக்ட் பண்ண இயலவில்லை
செல்பேசி வழியாக வருகிறேன்.

தனிமரம் சொன்னது…

அருமையான சந்தம் சிந்தும் கவி வரிகள் !

நிஷா சொன்னது…

வாவ் ! ரசித்தேன். நிரம்ப நாட்களுக்கு பின் ரசித்து வாசித்த கவிதை. அருமை

Thulasidharan V Thillaiakathu சொன்னது…

தமிழ் என்ன இதம்!!! சுகம்! அருமை!!! சீராளன்!! தமிழ் தங்களிடம் விளையாடுகிறது! மிக மிக ரசித்தோம்! ரொம்ப நாள் ஆயிற்றோ நீங்கள் இடுகை இட்டு!!

சீராளன்.வீ சொன்னது…

வணக்கம் ஜி !

என் கவிதைகளுக்கு எல்லாம் முதல் ஆளாக வந்து கருத்துச் சொல்வதை இட்டு மிக மகிழ்கிறேன் அன்புக்கு நன்றி ஜி

ஆமா ஜி தமன்னா என் கண்ணுக்கும் தெரியல்ல எங்கே ஓடிட்டாளோ பாவி பயபிள்ள சொந்த வாக்குப் போடவும் முடியல்ல .....ஹிர்ர்ர்ரர்ர்ர்ர்

மீண்டும் நன்றிகள் ஜி

சீராளன்.வீ சொன்னது…

வாங்க பூசாரே வாங்க எங்கடா ஆளைக் காணல்ல என்று பார்த்தேன் இந்தா வந்துட்டீங்க இல்ல ளகரம் ழகரம் விளக்கத்தோடு ...தங்கள் புரிதல் கண்டு மகிழ்கிறேன் மியாவ் வாழ்க நலம் வாழ்க பல்லாண்டு

சீராளன்.வீ சொன்னது…

வணக்கம் கரந்தை நண்பரே !

படிக்கப் படிக்கத் தேனூறும் வார்த்தைகள்தான் தேடித் பிடிக்கிறேன் தினமும் எழுதத்தான் முடியல்ல இருந்தும் முயற்சி செய்கிறேன் நன்றி

வாழ்க பல்லாண்டு வளத்துடனும் நலத்துடனும்

சீராளன்.வீ சொன்னது…

ஹலோ மியாவ் !

என்னது பேச்சுத் தமிழில் எழுதவா அப்போ கம்மாக் கரையில என்னும் பாட்டுப் போலத்தான் எழுதணும் சரி தங்கள் ஆசை விரைவில் நிறைவேறும் மீண்டும் நன்றிகள் பூசாரே வாழ்க நலம்

சீராளன்.வீ சொன்னது…

வணக்கம் புலவர் ஐயா !

தங்கள் வருகைக்கும் கருத்துக்கும் மிக்க நன்றிகள் கண்டிப்பாகத் தொடர்கிறேன் தொடர்வேன்
வாழ்க பல்லாண்டு வளத்துடனும் நலத்துடனும்

சீராளன்.வீ சொன்னது…

வாங்க தனிமரம் !

தங்கள் வருகைக்கும் அன்பின் கருத்துக்கும் நெஞ்சம் நிறைந்த நன்றிகள் வாழ்க நலம்

ஆமா இப்போது தனிமரம் இல்லையே நீங்கள் அவ்வ்வ்வ் ......

மிக்க மகிழ்ச்சி சகோதரா

சீராளன்.வீ சொன்னது…

வாங்க நிஷா வாங்க ஆல்ப்ஸ் தென்றலே வாங்க.......

தங்கள் வருகையும் கருத்தும் உளமினிக்க வைக்கிறது வாழ்த்துகிறேன்
நன்றிகள் பலகொண்டு ...........

வாழ்க பல்லாண்டு வளத்துடனும் நலத்துடனும்

சீராளன்.வீ சொன்னது…

வணக்கம் கீதா !

தில்லையின் செங்காந்தாள் செந்தமிழின் முன்னேந்தல் என்னுடைய எல்லாக் கவிகளுக்கும் கருத்திட்டு செல்லும் உங்கள் வலைப்பூதான் நான் வந்ததில்லை வருந்துகிறேன் இனி வருவேன் கண்டிப்பாக ..............

தங்கள் அன்பின் வரவுக்கும் கருத்துக்கும் நெஞ்சம் நிறைந்த நன்றிகள் வாழ்க வளத்துடன்

மனோ சாமிநாதன் சொன்னது…

கவிதை மிக அருமை! தொடர்ந்து எழுதுங்கள்! இனிய வாழ்த்துக்கள்!!

சீராளன்.வீ சொன்னது…

வணக்கம் !

மனோ சாமிநாதன் கூறியது...

கவிதை மிக அருமை! தொடர்ந்து எழுதுங்கள்! இனிய வாழ்த்துக்கள்!!

இடர்வந் தழிந்தால் அன்றி இதைநான் தொடர்வேன் என்றும்

தங்கள் வருகைக்கும் கருத்துக்கும் மிக்க நன்றி மா

வாழ்க நூறாண்டு வளத்துடனும் நலத்துடனும்